Chèf gang yo kap opere nan kapital la mete plis pase 400 timoun ki poko menm gen 18 lanne nan mouvman gang

• Par Daphney AIMÉ
• 25-04-2024
• 5626
• 0
• Le Placentin

Jean Rebel Dorcénat, pòt pawòl “Commission Nationale Désarmement, Démolition et Réinsertion (CNDDR) “ fè konnen gen plis pase 400 timoun ki poko menm gen 18 lanne ki nan mouvman gang.

M. Dorcénat revele ayè Mèkredi 24 Avril la, sou antèn radyo metropòl, nan emisyon "le point" chèf gang kap opere nan rejyon metwopolitèn Pòtoprens lan, rekrite plizyè timoun kap viv nan move kondisyon akòz fèb mwayen ekonomik paran yo.

Gen kèk nan timoun yo se pi gran yo ki enfliyanse yo, nan met nan tèt yo, yap gen pouvwa, lajan, moun ap respekte yo epi yap lib pou yo fè sa yo vle. Pou pòt Pawòl la, minè sa yo pi danje pou sosyete an menm si leta ta rive touye tout gwo gang yo.

Sou yon lòt bò, ki li fè konnen gen anviwon 800 estasyon moto ki gen rapò dirèk ak bandi, sa ki pèmèt yo kontwole plizyè katye nan Pòtoprens.

Pòt pawòl CNDDR lan di, li sezi wè kijan gouvènman an pa bay Komisyon an regle anyen pou li malgre, yo gen enfòmasyon enpòtan sou fonksyonman gang yo. Epi yo gen plizyè rapò disponib pou yo ta pibliye men, Leta manfouben an meprize Komisyon an.

Pou l fini, Jean Rebel Dorcénat mande gang pou yo obsève yon trèv yon mannyè pou bay peyi an yon ti chans poul vanse. Paske pou kounya la, pa gen anyen kap mache ladanl.