Lapolis ak Lajistis arete 3 prezime kidnapè ki fè pati Gwoup gang “ Gracia “ ap dirije nan sid peyi a

• Par Daphney AIMÉ
• 07-05-2024
• 3956
• 0
• Le Placentin

Jeff Saliba, Jean-Jules Alexis alias Messi ak Réginald Constantin se non 3 prezime Kidnapè, lajistis nan komin Aken arete nan Senlwi di Sid nan lokalite Chèrèt, Lendi 6 Me 2024 la.

Komisè Gouvènman Aken an, Me Adrien Exama, nan yon rankont ak laprès prezante 3 endividi sa yo bay popilasyon an. Li akize yo poutèt yo te kidnape 2 jèn fi nan lokalite a epi, dènye sa yo sot kidnape la se yon demwazèl ki rele Prenise prénecuse, paske li pat vle renmen ak youn nan yo, yo sekestre l epi egzije gwo lajan pou libere l.

Chèf Pakè a fè konnen, 3 nèg sa yo fè pati de yon gwoup kriminèl ki gen nan tèt li "Gracia", prezime asasen sa ki te koupe tèt yon Manbo epi sove ak li. Kotel kache pa anpeche l kontinye kowòdone zak malfezan nan Senlwi di Sid.

Me Exama konfime se pa premye fwa mechan sa yo ap Kidnape jèn fi.Yo te pran yon demwazèl 16zan ki rele Claudina, ki te temwaye mizè yo fèl pase .

Pi lwen, komisè a sètifye lap met nan sou Gracia kanmenm, epi lap depatya rezo kriminèl sa pak an pak avan yo komèt pi gwo zak nan Jiridiksyon an.