Antèman moun ki te mouri nan glisman tèren Okap yo chante

• Par Jean Rony Poito PETIT FRERE
• 12-05-2024
• 2246
• 0
• Le Placentin

Antèman moun ki te mouri nan glisman tèren yo chante jodi samdi 11 me 2024 la, nan Pawas Sakrekè nan vil Okap.

Aniberky Gabriel, 3 lanne, Bernard Demesvard, 28 lanne, Frandelin Noël, 8 lanne, Frandeline Noël, 11 lanne, Juliana Valmyr, 58 lanne, Love Darly Demesvard, 10 lanne, Lovelie Demesvard, 17 lanne, Miderlove Demesvard, 7 lanne, Previl Pierre, 55 lanne ak Evenson Demesvard ki gen 13 lanne te mouri nan dat premye ak de me 2024 la, nan yon glisman tèren ki te fèt nan zòn Labori.

Jodi samdi a divès otorite nan vil Okap tankou, Majistra vil la Yvrose Pierre te prezan nan fineray sa pou te kapab rann yon dènye omaj avèk moun sa yo, daprè yon nòt responsab kominikasyon Meri a mete deyò.

Selon enfòmasyon reskonsab kominikasyon meri a ki se Nelson Deshommes pataje avèk redaksyon jounal la, se meri a ki pran responsablite pou chante antèman moun sa yo ki pèdi lavi yo nan dram sila.

Yon lòt fwa ankò, yo pwofite prezante senpati yo ak tout fanmi, zanmi viktim yo.