Kèk militan Pitit Desalin yo nan vil Okap eksprime fristrasyon kont lidè yo a, Moïse Jean-Charles selon yo menm ki trayi yo

• Par Yvena ISIDOR
• 15-08-2024
• 1408
• 0
• Le Placentin

Plizyè patizan Moïse Jean Charles te rasanble jodi 15 dawout la sou plas devan Katedral Okap la, nan lokazyon fèt Notre-Dame nan, pou manifeste kont lidè politik la. Militan yo akize Moïse ki, daprè yo, voye yo jete depi li fin nan pouvwa a aprè demisyon Premye minis Ariel Henry.

Se plizyè jenn gason nan Okap ki t ap eksprime kòlè yo dèske l pa janm voye zye gade yo pandan l ap souse manmèl la nan pouvwa Garry Conille lan. Sa ki plis endiye yo, daprè sa yo rakonte, se lè yo gade yo wè se menm ajan polis ki te konn ap tire sou yo nan manifestasyon yo ki tounen sekirite lidè a e k ap anpeche yo wè l lè yo bezwen l.

Pi lwen, mesye yo fè konnen ke yo te kwè nan ideyoloji ke Moïse Jean Charles tap preche a e ke yo kapab di ke pi gwo desepsyon yo te ka pran nan men l se lè yo vin konstate mank rekonesans li anvè yo menm ki te konn ap kraze brize sou lòd sekretè jeneral pati politik Pitit Desalin epòk mouvman leve kanpe pou chavire pouvwa ki te konn fèt nan nan vil la.

Akonpanye de Konseye Prezidan Vertilaire Emmanuel, si se pat konkou Lapolis, Moïse Jean Charles pa tap ka soti andan legliz la anba menas pwotestatè yo.